Debagoieneko Mankomunitateak bi hezitzaile kontratatu ditu datozen zazpi asteetan hondakinen inguruko informazioa emateko. Bihar hasiko dira Antzuolan zeregin horretan, eta urtarrilaren 21era arte arituko dira. Oñatin, berriz, hilaren 23an hasi eta otsailaren 25ean amaituko dute. Era horretan, asmoa da gerta daitezkeen intzidentziak zuzentzea.
Hezitzaile horiek arratsaldetan arituko dira lanean, kaleetan, eta bilketa puntuetan agertzen diren arau hauste eta intzidentziak erregistratzeaz eta dagokien erantzuna emateaz arduratuko dira. Erabiltzaileei hondakinak nola bereizi eta atera behar diren ere azalduko diete, eta baita komertzioei ere.
Hobetzeko neurriak
Bi herri horietan hezitzaileak ibiliko diren arren, Mankomunitateko kideek azaldu dute bi lekuetako hondakinen bereizketa tasak "oso onak" direla, eta "orokorrean", sistemaren funtzionamendua "egokia" dela. Dena den, sistemak hobetzeko hainbat neurri hartuta dituzte iaztik. "Hala nola, etxe guztietara esku orri informatiboak banatzea edo esekitokien beheko posizioak hutsik uztea".
Izan ere, "gutxiengo bat diren arren", aitortu dute badirela "jokabide desegokiak eta arau hausteak", eta horiek zuzentzeko helburua duela heziketa kanpaina honek.
