Herri ezberdinetako herritarrek osatutako 50 pertsona inguruko talde bat igo da urtero legez urtarrileko lehen igandean Intxortara gudariei omenaldia egiteko. Euria eta hotza izan dituzte bidelagun, baina giro horri aurre egiteko salda banatu dute musikak lagunduta.
Ondoren, gudarien omenezko hitzartzearen txanda izan da. Hurrengo hitzak irakurri dituzte, besteak beste: "Iraultzarako grinak hauspotu zituen gudariak, askatasuna amets zutelarik aurre egin zieten zapaltzaile eta tiranoei. [...] Haien ametsak betirako dira gureak, herriarenak: Euskal Herri aske, euskalduna, sozialista eta feminista amesten jarraituko dugu!".
Iraganeko eta gaur egungo egoeraren analisi politikoa ere egin dute bertaratu direnek talde argazkia egin aurretik.