Urte biko edizio ez-ohikoen ostean, kulturaren plazak betiko formatua berreskuratu du aurten: "Ospatzeko urtea izan da, berriz elkartzekoa, kulturaren plazari berriro ere bizia ematekoa, eta giro hori sumatu dugu Azokan. Oso eskertuta gaude", azaldu dute Gerediagatik.
Eztanda egin du Azokak edizio honetan, bisitari, salmenta eta giroari dagokionez. "Bost egun hauetan bizitako eztanda hori herriz herri Euskal Herri osoan zehar zabaltzea da erronka, Azoka ez dadin oasi bat izan, Durangon sentitu dugun komunitate hau zabaltzen jarrai dezagun".
Ikasle Goizarekin hasi zen aurtengo edizioa, bi urteren ostean, eta berriro ere milaka ikaslek bete zituzten Landako Guneko erakusmahaiak. Gazte EztanDA! eguna ere ospatu du Azokak lehenengo aldiz, gazteentzat antolatutako egitarau bereziarekin. Horren balorazio positiboa egin du, "gazteak erakartzen jarraitzeko bidea ireki delako".
Azokako bost egunak oso jendetsuak izan direla azpimarratu dute antolatzaileek eta etengabea izan dela bisitarien joan-etorria. "Landako gunea beteta egon da egunero, eta abenduaren 8a izan zen egunik jendetsuena. Azokako gune guztietan ere aforoa bete da ekitaldi askotan".
Salmentei dagokienez, hainbat parte-hartzailek nabarmendu dute edizio honetan salmentak oso onak izan direla, osasun-krisia heldu aurreko kopuruetara helduz eta kasu askotan gaindituz. "Zalantzarik gabe, kulturzaleek aurrez aurreko Azokari lehentasuna eman diote online dendaren aurrean".
Datorren urteko datak ere aurreratu ditu Gerediagak. 58. Durangoko Azoka abenduaren 6tik 10era izango da.
