2023ko urtarrilaren 26tik ekainaren 29ra egingo dute Donostian Mondragon Unibertsitateak eta Adegik bigarren aldiz antolatu duten Lan Etorkizunerako Pertsonak, Kultura eta Talentua Aditu Ikastaroa.
Mondragon Unibertsitatek azaldu dutenez, garatuko duten programak bi helburu ditu. Batetik, giza baliabideen eta pertsonen kudeaketarako arloko profesionalei garatzen eta ikasten laguntzea, pertsonak kudeatzeko estrategiak eskura ditzaten. Bigarren helburua da parte-hartzaileak trebatzea lanaren etorkizuneko joera berriek pertsonengan, lehiakortasunean, garapenean eta erakundeen jasangarritsunean izango duten eragina ulertzeko.
Formatu erdipresentziala
Programa modu erdipresentzialean egingo dute: hamabostean behin, ostegun arratsaldeetan, eskolak emango dira eta horiek mentorizazio pertsonalizatuari eta elkarlaneko ikaskuntzari buruzko online saioekin uztartuko dituzte.
