Euskal preso, iheslari eta deportatuak etxeratzeko prozesuan egindako "lorpenak" txalotu ditu gaur Sare Herritarrak Donostian: "Inork ez zigun esan erraza izango zenik. Bagenekien hamarkadetan zehar euskal presoak pairatzen ari diren eskubideen urraketari amaiera ematea zaila izango zela, baina pixkanaka mugarri berrietara iristen ari gara".
Presoak Euskal Herrira gerturatzea "ahalegin kolektibo baten emaitza" izan dela azaldu dute, eta hori mobilizazioekin, parlamentuetara eskariak egiten edota euskal sindikatu, erakunde eta pertsonekin hitz eginez lortu dela, besteak beste: "Norabide berean eman ditugu urratsak, aliantzak sortuz eta elkarrekin bultzadak emanaz. Pozgarria da, bakea eta bizikidetza erdiesteko bide luze honetan egindako lorpena baita".
Halere, oraindik "urruntze politika" amaitu ez dela azpimarratu dute, eta Espainiako espetxeetan dauden 37 presoak ekarri dituzte gogora: "Urruntze-politika oraindik ez dela amaitu esateko 50 arrazoi baino gehiago ditugu. Izan ere, oraindik ere Espainiako eta Frantziako kartzeletan euskal herritarrak preso egoten jarraitzen dute".
Gauzak horrela, mobilizatzen jarraitzeko dei egin du Sare Herritarrak eta urtarrilaren 7an Bilbon egingo den manifestazioaren berri eman du. "Eskubideak defendatzen ari gara. Giza Eskubideak. Eta horregatik ideologia politiko desberdinak ditugun pertsonok bidea elkarrekin egin dezakegu; askatasunik gabeko pertsonei dagozkien eskubideen defentsak batzen gaituelako. Hau da jarraitu beharreko bidea", nabarmendu dute.