Etxera bidea gertu! lelopean, egun osoko egitaraua prestatu du, Donostian, biharko, euskal preso, iheslari eta deportatuen giza eskubideen alde lan egiten duen Sare erakundeak. 11:00etan batuko dira, Bulebarrean, Izan bidea dinamikako azken kilometroa egiteko: "Etxerako, elkarbizitzarako eta bakerako bidean, Euskal Herriak duen biztanle kopurua kilometroetan egitea izan da dinamikaren helburua: 3.127.326 kilometro, hain zuzen; banaka edo taldeka, korrika, oinez zein bizikletan egiteko aukera egon da, sakelakoan Izan bidea aplikazioa deskargatuz", azaldu dute bailarako Sareko kideek.
12:00etan, "manifestazio koloretsua" hasiko dute Pio XII.a kalean, eta Ilunberantz zuzenduko dira, bertan izango direlako, hurrenez hurren, ekitaldia eta jaialdia. Izan ere, arratsalderako, txosnagunea, bazkaltzeko zerbitzua, haurrentzako gunea, bertso-saioa eta kontzertu eskaintza zabalaz gozatu ahalko dute bertaratutakoek –sarrerak asteazkenean agortu ziren–.
Bost autobus bailaratik
Debagoiendar ugarik egingo dute bat Sareren ekitaldiarekin. Bihar, 10:00etan, irtengo dira autobusak, Arrasate, Bergara eta Oñatitik, eta bueltatzeko bi aukera egongo dira, lehena 20:00etan eta bigarrena 02:30ean. Aretxabaletatik, gainera, Ilunbeko jaialdira zuzenean joateko autobusa antolatu dute.
Sareko kideak "pozik" daude Izan bidea dinamikak bailaran jaso duen babesarekin: "Hainbat ekimen egin ditugu, hala nola bertso saioa, mendi tontorren igoera eta Degurixatik etxerako bidean ardien jaitsiera".
Urriaren 8ko ekimen eta jaialdiarekin itxiko dute Izan bidea dinamika: "Euskal presoak etxetik gero eta gertuago egotea aurrerapauso garrantzitsua dela adieraziko dugu, eta eskerrak eman, bide batez, bide horretan aktibo izan diren pertsona guztiei; bestetik, oraindik ere salbuespena guztiz amaitzeko bidea egiteke dugula gogoratuko dugu". Horrenbestez, urtarrileko Bilboko manifestazioa izango da Sarek antolatuko duen hurrengo hitzordu garrantzitsua.