Gizartea eraldatzen duten nazioarteko pertsona eta erakundeen lana aitortzea du helburu Fair Saturday sariketak, eta, aurten, Garabide elkartearen lana nabarmendu dute, hala nola hizkuntza gutxituak biziberritzeko prozesuetan eginiko lanarengatik.
Bilboko Guggenheim museoan egin zuten sari banaketa astelehenean, eta Iñaki Martinez de Luna Garabideko lehendakaria joan zen. "Sari batek beti hauspotzen du animoa, eta hala izan da oraingoan ere. Saio osoaren planteamendua izan zen hunkigarria". Izan ere, Garabiderekin batera beste zortzi egitasmo ere saritu zituzten, guztiak "gizarte osasuntsuagoa" erdiesteko lanean aritzen direnak, Garabideko presidentearen hitzetan.
Besteak beste, Nuccio Ordine idazle eta filosofo italiarra, Herbehereetako Musicians Without Bordes erakundea eta Bilboko Pabellon 6 antzerki proiektua izan ziren sarituetako beste hiru. Eta, era horretan, Fair Saturday fundazioaren helburua da ekintza eredu berriak sustatzearen balioa nabarmentzea.
"Garrantzitsuak dira horrelako sariketak, halako proiektuetan murgilduta dauden pertsonek ez baitute, normalean, saririk jasotzen", adierazi du Martinez de Lunak. Haren arabera, boluntarioa da egin ohi den lana, eta, beraz, horrelako aitortzak, "premiazkoak".