Eustatek argitaratu dituen datuen arabera, Euskal Autonomia Erkidegoko biztanleriaren %23a 65 urtetik gorako pertsonek osatzen dute. Europako herrialdeekin alderatuz proportzio altuena duen bigarrena da erkidegoa.
Datu hori ospitaleratzeen eta heriotza-kausen esparrura eraman du estatistika erakundeak.
2020an, 222.438 ospitaleratze erregistratu ziren EAEko erietxeetan eta erdia baino apur bat gehiago izan ziren 65 urtetik gorakoak. Horri lotuta, ospitalean igarotako gauei erreparatuta, 65 urtetik gorako pertsonen egonaldiak zenbateko osoaren % 57 izan ziren. "Adinekoak ospitaleratzeko kausa nagusiak zirkulazio- eta digestio-gaixotasunak izan ziren bi sexuetan, eta, ondoren, kanpo-kausak emakumeetan, eta tumoreak, gizonetan", zehaztu du Eustatek.
Heriotzei lotuta, 2021ean, 23.073 pertsona hil ziren, eta batez besteko adina 81 urtekoa izan zen.
Internet eta ingurumena ere aztergai
Beste zenbait alorren gaineko datuak ere argitaratu ditu Eustatek; adibidez, 65 urtetik gorakoek duten ingurumen-kontzientziaren eta Interneten erabileraren ingurukoak. %94k azaldu du kezkatuta dagoela ingurumenagatik eta ia guztiek erabili izan dute Internet noizbait.