Proiektua gradua edo goi-mailako heziketa bat bukatu berri dutenei edota lehenengo lan esperientzia bilatzen ari direnei zuzenduta dago.
Parte hartzeko hainbat baldintza daude: 2o eta 44 urte bitartekoa izatea, goi-mailako ikasketak –lanbide heziketako goi-mailako ziklo bat edota unibertsitate ikasketak– amaituta izatea, langabezian egotea –ezinbestekoa ez den arren– eta Debagoieneko herriren batean erroldatuta egotea.
Zertan lagunduko du Hazilanek?
Hazilanek parte-hartzaileen gaitasunak identifikatu eta indartzen lagunduko die, eta lana lortzeko behar dituzten baliabideak emango dizkie –lantegi teoriko-praktiko baten bidez–. Ondoren, eskualdeko enpresetan praktikak egingo dituzte, eta horrek lan-esperientzia berriak biziarazi eta enplegurako sarbidea erraztuko die.
Antolatzaileak pozik daude lortutako emaitzekin; izan ere, 2021ean izandako bi edizioen arabera, parte-hartzaileen %90ek laneratzea lortu dute –bide desberdinetatik bada ere–. Beraz, ondorioztatu dute tailerrean landutako konpetentzia eta edukiek lan-bilaketarako baliagarriak zaizkien tresna eta baliabideak eskaintzen dizkietela.
Aurkezpen jardunaldia
Egitasmoaren berri emateko eta zalantzak argitzeko, aurkezpen saioa egingo da urriaren 4an, asteartean, 10:00etan, Debagoieneko Mankomunitatean, Udalaitz aretoan, Arrasaten. Bertaratzeko, aldez aurretik izena emateko formularioa betetzea beharrezkoa da.
Proiektuan parte hartu nahi izanez gero, izena emateko eskaera-orria bete eta bertan zehazten den dokumentazioarekin batera Mankomunitatean aurkeztu beharko da urriaren 14a baino lehen.
Informazio gehiagorako, idatzi mezu bat hazilan@debagoiena.eus helbide elektronikora, deitu 943 79 30 90 telefono zenbakira edo jo Mankomunitatearen webgunera.