Ekimen hori Arrasate, Bergara, Oñati, Aretxabaleta, Eskoriatza eta Antzuolako Gizarte Zerbitzuekin lankidetzan garatzen du Gurutze Gorriak. Laguntza jaso ahal izateko familia eskatzaileek Debagoienean bizi behar dute, kalteberatasun-egoera aitortua izan, udaletako gizarte-zerbitzuek artatu behar dituzte eta seme-alabak matrikulatuta izan behar dituzte lehenengo edo bigarren hezkuntzako ikasturteetan.
Debagoieneko Gurutze Gorriko presidente Javier Igartuak ekimenaren helburua azaldu du: "Familia batzuek bizi duten prekarietate-egoeraren jakitun seme-alaben eskola-materialaren beharrei erantzutera bultzatzen gaitu, haien hezkuntza bultzatzeko helburuarekin, nahiz eta zailtasun gehigarriak izan". Eta gaineratu du eskaerak %12 hazi direla aurten.
Ekarpen partikularrak eta enpresak
2022-2023 ikasturterako eskola-materiala banatu ahal izan dute herritarrek egindako ekarpen partikularrei, Gurutze Gorriko bazkideen konpromisoari eta uztailean egindako Urrezko Zozketaren diru-bilketari esker. Hala jakinarazi du Igartuak: "Eskerrak eman nahi ditugu jasotako dohaintza guztiengatik, horrelako ekimen solidarioak garatzeko aukera ematen dutelako".
Era berean, ekimen solidario horretan parte hartu duten hamabost boluntarioen lana ere eskertu gura izan dute, baita ekimena garatu den
Debagoieneko udalerrietako gizarte-langileekin izandako lankidetza estua balioan jarri ere.
Borondatezko jarduera
Eskualdeko ia 100 boluntariok osatutako taldeak dihardu lanean Debagoieneko Gurutze Gorriaren bueltan, hainbat eratako jarduerak eta proiektuak garatzen. Oso talde heterogeneoa da, gainera, 18 urtetik 70 urtera bitarteko herritarrek osatua.
Gurutze Gorriak Debagoienean garatutako ekimenen gaineko informazio gehiago jakin gura izanez gero Elorregin (Bergara) duten egoitzara jo daiteke, telefonoz deitu –943 76 55 76– edo mezu bat bidali –altodeba@cruzroja.es–.