Mundukidek bultzatu eta dinamizatutako Gizarte eraldaketarako hezkuntza Kooperatiboa proiektuaren baitan, Brasilen dira egunotan proiektuaren parte diren Arizmendi Ikastolako, Copreciko, Maierreko eta Fagor Ederlaneko sei ordezkari. 2021eko uztailean Brasilgo MST ko mugimendu sozialeko kideek Euskal Herrira egindako bisita itzultzen ari dira, bertako errealitatea gertutik ezagutu eta "esperientziak elkar trukatzeko".
Izan ere, parte-hartzea, printzipio kooperatiboak, genero-desberdintasunak eta iraunkortasun ekologikoa oinarri dituen Gehikoop proiektuaren xedea "leku bakoitzean ematen diren erantzunak ezagutzea eta irtenbide bateratuak edo koordinatuak emateko antolatze prozesuak osatzea" da. Duela bi urte hasitako elkarlanaren helburuak egikaritzen ari dira, beraz.
Agenda osatua
Hamabost egunetan MST mugimendu soziala osatzen duten hainbat kokaleku, kanpamendu, kooperatiba, eskola eta komertzio ezagutuko dituzte, baita nazio mailan eragiten ari diren erakundeei bisitak egin ere. Beste hainbat hitzorduren artean, Paraná estatuko kooperatiba, kokaleku eta kanpamenduak zein Sao Pauloko Armacens do Campo supermerkatu sarea ezagutuko dituzte.
