Majestic analitika zerbitzuak munduko milioi bat webgune garrantzitsuenen zerrenda argitaratu du. SEO zerbitzuekin zein webguneen posizionamenduekin lan egiten duen enpresak 2022ko martxoaren 28tik bildu dituen datuekin osatu du zerrenda, eta egunero egiten dituen sareko baheketen arabera eguneratzen du hurrenkera.
Mundu osoko 1,2 bilioi estekatik gora aztertuta, google.com, facebook.com, youtube.com, twitter.com eta instagram.com dira bost domeinu garrantzitsuenak. Bada azterketak utzi duen beste datu adierazgarri bat ere. Zerrendan azaltzen diren webguneen %10etik gora jada ez daude erabilgarri; hots, estekak aktibo daude eta beste webgune batzuetatik loturak daude eginda, baina domeinu horiek ez doaz eduki jakin batera.
83 .eus
Milioi bat webguneko zerrendan, 83 dira .eus domeinua dutenak. euskadi.eus –10.051.–, ehu.eus –11.023.– eta eitb.eus –17.296.– dira zerrendan ageri diren lehen hiruak. Goiena Komunikazio Taldearen goiena.eus, berriz, 551.746. postuan ageri da, eta 46.a da .eus domeinuen artean. Euskarazko hedabideekin erkatuz gero, laugarrena da zerrenda, berria.eus, argia.eus eta hitza.eus-en ostean.