13:00etatik 21:00etara luzatuko da abisua, eta Gipuzkoa barnealderako 35 eta 38 gradu arteko tenperaturak iragarri ditu Euskal Meteorologia Agentziak. Arrasaten, esaterako, termometroa 38 gradutara heltzea da aurreikuspena. Dena den, 15:00etatiik 17:00etara freskatze aldera egingo du. Kostaldean, aldiz, ez dira hain tenperatura altuak espero, 28 graduko maximoak baizik.
Maximo historikoak
Eusko Jaurlaritzako Segurtasun Sailak abisu horia ezarri du gaurko, baina atzo ere beroa izan zen protagonista. 30 gradukoak izan ziren tenperaturak Araba, Bizkai eta Gipuzkoako hiriburuetan, eta udalerri batzuetan ere 35 graduko langa gainditu egin zuten termometroek. Hain justu, Euskalmetek iragarri duenez, 2004tik ez da horrelako tenperaturarik erregistratu urriaren hasieran; ordu hartan, 30 gradu erregistratu ziren gehienez ere, eta, beraz, markak historikoak dira.
Arrasaten, esate baterako, 35,6 gradukoa izan zen atzo tenperatura altuena; Oñatin, berriz, 33,8 gradukoa. Iaz, aldi berean, termometroek ez zituzten 25 graduak gainditu bi herri horietan.
