Javier Igartua Debagoieneko Gurutze Gorriko presidenteak diru bilketa hazi izanaren arrazoiak azaldu ditu: "Pandemiak herritarren sentsibilitate berri bat aktibatu du osasunarekiko, prebentzio eta larrialdi-zerbitzuen garrantziarekiko eta kolektibo kalteberen aldeko gizarte-proiektuekiko". Eta oso eskertuta agertu da zozketak izan duen harreragatik eta Gurutze Gorriak egindako lanari emandako babesagatik; izan ere, diru-bilketa %25 hazi da aurreko urtearekin alderatuta: "Horrek erakusten du Debagoieneko herritarrek babes handia ematen diotela Gurutze Gorriak egindako lanari, eta martxan jarritako gizarte-proiektuak sendotzen dituela".
Zozketaren zenbaki saritua 19:00etan jakinaraziko dute honako helbidean: www.cruzroja.es/sorteodeoro/
Erakundetik azaldu dute bildutako dirua San Prudentzion duten egungo ekipamendua mantentzeko eta hobetzeko izango dela, baita urtean zehar Debagoienean kolektibo ahulei zuzendutako gizarte-proiektuetarako ere.
525 laguni laguntza iaz
Datu batzuk eman gura izan dituzte Gurutze Gorriko kideek. Gaur egun, Debagoieneko 67 boluntario dira, teknikariekin batera, lan hori egiten dutenak. Joan den urtean, 525 pertsona baino gehiago izan ziren onuradun hainbat gizarte-proiekturen bidez, eta jarduera soziosanitario eta solidarioa garatzeko 18 eta 70 urte arteko ia 100 boluntariok osatutako taldea dago.
