Euskal Kontsumitzaileen Alkarteak 2016an demanda "kolektibo" bat jarri zuen, Laboral Kutxak kontu korrontea posizio zordunetan edo "zenbaki gorritan" zuten erabiltzaileei kobratzen zien 30 euroko komisioa "gehiegizkoa" zela iritzita. Artesaria deuseztatzeko jarri zuten helegitea Auzitegi Gorenean. Gobernuz kanpoko erakundearen hitzetan, "bezeroari ez zitzaion inolako zerbitzurik ematen", eta neurriak ez zituen "gardentasun-irizpide eta bankuaren jardunbide-egokiak betetzen".
Justiziak "deuseztatu" egin zuen komisioa kobratzeko aukera, bankuak "zerbitzu gehigarririk" eskaintzen ez zuela argudiatuta. Auzitegiak ez du onartu Laboral Kutxak epaiari jarritako errekurtsoa; beraz, epaia irmoa da. Hala, banku arrasatearrak komisioa "aplikatzeari utzi eta bere kontratu guztietatik ezabatu behar du", kontsumitzaileen defentsan aritzen den elkartearen hitzetan.
"Kobratutakoa itzultzera"
Etorkizunean zein iraganean du eragina epaiak EKAren esanetan: "Bidegabeki kobratutakoa itzultzera derrigortu dio sententziak". Bide horretan, "kaltea jasan duten gure bazkideak" erreklamazioak bideratzera "animatu" ditu elkarteak.
