Lehiaketez beteriko aste bukaera pasa dute Bolintxo Okindegia-Lana S. Coop. taldeko txirrindulariek. Kadete mailako Edurne Ormaetxea Arriaran aramaioarrak eta Itsaso Askasibar Belar elgetarrak Euskaldun txapelketan parte hartu zuten Nafarroan.
Lehenengo lasterketa zapatuan izan zen, Lakuntzan. Bi txirrindulariek hirugarren posturako lehian amaitu zuten proba: Ormaetxea bosgarren postuan sailkatu zen eta Askasibar, hamabosgarrenean. 41 kilometro izan zituen lasterketak, eta ibilbidean Lizarragako portua igo behar izan zuten txirrindulari gazteek.
Domekan, berriz, 53 kilometroko proba izan zuten, Tafallan. Zapatukoarekiko zeharo desberdina izan zen, haizeagatik eta sterrato-agatik. Hala ere, bi txirrindulari debagoiendarrak onenen artean sailkatu ziren berriro ere: Ormaetxea zazpigarren izan zen eta Askasibar, hogeigarren. Azken horrek zulatua izan zuen.
Ondorengo lasterketak Berriatuan eta Markinan izango dituzte, Challenge Lea-Artibairen barnean.