Oñatiko, Arrasateko, Bergarako edota Aretxabaletako EH Bilduko hainbat kide joan dira Konferentzia Munizipalistara. Egun osoko egitarauaren barruan, gai hauei buruzko tailerrak izango dituzte: energia trantsizioa, gobernantza herrigilea, hezkuntza, gobernantza feminista, etxebizitza eta tokiko garapena.
Horietan parte hartzen dabiltza debagoiendarrak, eta horren ostean, askotariko udal esperientziak ezagutzeko aukera ere izango dute. Tartean da Oñatiko Onaroren proiektua.
Bertara joan direnek adierazi dute 500 lagun inguru daudela, hainbat herritatik joan direnak, eta horiei azalduko diete Oñatiko esperientzia: "Esan daiteke erreferentzia moduan jarri dela, beste hainbat proiekturekin batera".
Bestetik, Oñatiko alkate Izaro Elorzak parte hartuko du itxiera ekitaldian.