Mondratek eta Tolosako Laskorain taldeak launa egin dute zapatuan Musakolan jokatutako partiduan. "Orain gure esku dago. Hurrengo bi partiduak irabazi behar ditugu 'play-off'-a jokatu ahal izateko", dio Mondrateko entrenatzaile Julen Otxandiano.
Aukerak badituztela bai, baina bi neurketak oso lehiatuak izango diren jakitun da Otxandiano: "Datorren astean etxetik kanpo jokatuko dugu, Elorrion, zapatu arratsaldean. Elorrioko taldea behera jaisteko arriskuan dago eta maila mantentzea helburu izanik, horretan ahaleginduko da. Irabazi egin gurako du, eta baita guk ere. Oso partidu lehiatua izango da. Eta hori irabaziz gero, Eskoriatzaren aurkakoa irabazi beharko dugu aurrera egin eta 'play-off' horretan sartzeko. Derbi indartsua izango da".
Eskoriatzak, berriz, bina egin du Tolosala taldearen kontra. "Ez dugu gaizki jokatu, baina bai egin akats handi pare bat. Lehenengoa partidua hasi eta lasterrera, eta beraiek jarri ziren markagailuan aurretik. Banakoarekin joan ginen atsedenaldira eta bigarren zatiaren hasieran egin genuen bigarren akatsa, markagailuan atzetik jarriz. Penaltia ere gelditu zuen gure atezainak. Azkenean, partidua amaitzeko minutu eta erdi falta zela sartu genuen biko berdinketa eman zigun gola", dio entrenatzaileak, Mikel Alkaidek.
Ekainaren 5ean derbia
Mondraten puntu berdinak ditu gaur Eskoriatzak eta hurrengo partiduak irabazten saiatuko da talde hori ere, Bigarren Nazional Mailara igotzeko aukera izateko. "Ez da erraza izango, baina ahalegin guztiak egingo ditugu. Lehenengo, hurrengo partidua irabazi behar dugu. Egia da etxean dugula eta ez kanpoan, Mondraten moduan, eta gure aurkariak ez duela ezer jokoan, jaitsi egin delako mailaz. Baina irabazi egin behar da. Eta ekainaren 5ean Mondrateren aurkakoa ere irabazi egin behar. Horrez gain, 'play-off'-a beste bi partidu dira eta hirugarren bat beste elkarte autonomiko bateko irabazlearen kontra. Eta hirurak irabazi behar dira Bigarren Nazional Mailara igotzeko".
Eskoriatzak eta Mondratek, partidu garrantzitsuak dituzte, beraz, hurrengo biak. Lehiatzeko prest eta gogoz daude, baina denboraldia luze egiten ari zaiela aitortu dute biek. "Talde askok amaitu dute denboraldia eta guri beste bi jardunaldi gelditzen zaizkigu. Eta 'play-off'-ean sartuz gero, beste bi. Luzea ari da izaten, bai", dio Otxandianok. "Lesioak ere agertu dira. Atseden hartzeko oso tarte txikiak izan ditugu, jardunaldi askoko denboraldia da, eta hori nabaritu egiten da", gaineratu du Alkaidek.