Gazte Euskaltzaleen Sareak bultzatutako manifestazioarekin bat egin dute bailarako hainbat herritarrek ere. Esaterako, AEDren baitako Ttak gazteen taldeak asteon egin du mobilizazioarekin bat egiteko deia. Baita Bergarako Xaxau konpartsak ere. Horrez gain, Mondragon Unibertsitateko Ernaik, La Furiak eta Markel Irizarrek ere bat egin dute ekimenarekin.
Manifestazioa Antiguon hasi eta Bulebarrean amaitu da. Antolatzaileek azaldu dute gaurko mobilizazioa inflexio puntu bat izan behar dela, uste baitute azken boladan euskararen inguruan asimilazio moduko bat egon dela, pentsatuz egoera ona dela. "Ez da egia, gauzak ez daude ondo, egoera larria da eta uste dugu herria antolatzeko eta aktibatzeko unea dela, bai eta egiturazko neurriak exijitzekoa", azaldu du Gazte Euskaltzaleen Sareko kide Begoña Garaikoetxeak.