Hirugarren Nazional Mailari hiru jardunaldi baino ez zaizkiogeratzen, baina a zer-nolako hiru jardunaldi. Azkenekoan, ekainaren 5ean, Mondratek eta Eskoriatzak elkarren kontra derbia jokatuko dute, eta bi taldeen helburua da derbi horretara bizirik iristea; alegia, play-off-etarako sailkatzeko aukerekin egotea. Fase horretara lau talde joango dira: dagoeneko sailkatuta daude Afantxo (71 puntu) eta Laskorain (63), eta beste bi txartelengatik lehian dabiltza Antiguoko (54), Gora (52, partidu bat gehiagorekin), Eskoriatza (52) eta Mondrate (52).
Mondratek etxean jokatuko du bihar, zapatua
Mondratek bihar, zapatua, Laskorain hartuko du Musakolan (17:30). Eta Julen Otxandiano entrenatzaileak eskaera egin die Arrasateko zaleei: "Etor daitezela partidura, euren babesa eskertuko dugu eta". Eskoriatzarendako ere hil edo biziko partidua da bihar Tolosako Uzturpe pilotalekuan jokatuko dutena (16:00); talde horrek jada ez du ezer jokoan.