Joan den zapatuan Espainiako Gobernuak abian jarri zuen Ekonomia Zirkularrerako Estrategia eta Hondakinen Legearen baitan, aurrerantzean, Hego Euskal Herriko taberna eta jatetxeek ura debalde eskaini beharko dute. Erabilera bakarreko plastikoak gutxiago erabiltzea da helburuetako bat, eta bestea, dendetan pisura erostea sustatzea. Hala, batetik, ostalariek beti eskaini beharko diete bezeroei iturriko uda dohainik edateko aukera. Eta bestetik, 2023ko urtarrilaren 1etik aurrera, 400 metro koadro baino gehiago dituzten elikagai dendek euren azaleraren %20 gutxienez eskaini beharko diete plastikoetan bildu gabeko produktuei.
Baina, legea hori baino zabalagoa da. Urtarrilaren 1ean ezarriko dituzte ekonomia zirkularra sustatzeko bi zerga: erabilera bakarreko plastikoen ekoizpenari jarriko diotena —kilogramoko 0,45 euro ordaindu beharko dute ekoizleek—, eta zabortegietan zaborra botatzeari ezarriko diotena. Eta bestalde, amiantoa erretiratzeko neurriak ere jaso ditu onartu berri duten legeak. 2023ko apirilaren 10a baino lehen, udalek errolda bat egin beharko dute amiantoa duten eraikinekin. Ondoren, hura kentzeko egutegi bat osatuko beharko dute. Eta, beranduenez 2028an kenduta egon beharko du amianto horrek eraikin guztietatik.
