Erreka Taldea zoriondu dute Debagoieneko sozialistek aerosorgailu erraldoien sektorean sartu izanagatik

Mirari Altube Arrese 2022ko api. 7a, 18:20
(Argazkia: Erreka)

Arrasate, Bergara eta Antzuolako PSE-EEko udal taldeek Antzuolan kokatutako Erreka Taldea zoriondu dute itsas aerosorgailu erraldoien sektorean sartu delako energia berriztagarria sortzeko: "Sektore horrek Errusiako gasaren alternatiba sustatuko du Europan gas-hornidurarako".

"Poztu egiten gaitu gure udalerrietako puntako enpresa batek ekonomiaren deskarbonizazioaren bidean nabarmentzen diren proiektuetan parte hartzeagatik. Are gehiago, pozgarria da enpresa-proiektu sendo horrek Debagoiena eskualdean lanpostuak sortzea", adierazi dute prentsa-ohar bidez hiru udal horietako sozialisten bozeramaileek, Arrasateko Victor Fuentesek, Bergarako Alberto Alonsok eta Antzuolako Miren Gallastegik.

Azaldu dutenez itsas parke eolikoek funtsezko bi zeregin dituzte: "Alde batetik, eredu energetikoaren aldaketa eragitea, eta, hain zuzen ere, energia berriztagarriaren etorkizuna dira; eta, bestetik, egun Europar Batasunak Errusiako hidrokarburoen menpe egoteari uztea dute helburu". Horregatik, Debagoieneko enpresa batek hain proiektu "garrantzitsu eta erabakigarrian" parte hartzeak  "harrotasunez" betetzen dituela gaineratu dute.

Erreka Taldea bezalako berrikuntza-enpresak sustatzea "inbertsio estrategikoa" dela ere adierazi dute: "Industria garbia baita, teknologikoki punta-puntakoa, eta balio erantsi handiko lanpostuak sortzen dituena".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak