Hitzarmenari esker, zabalkunde handia emango zaie kategoria txikietako lasterketei, baita amateur mailako Lehendakari Txapelketa, Euskaldun Txapelketa, eta Emakumezkoen Euskaldun Txapelketari ere. Txirrindulariak Webek Euskal Herri osoko errepideko txirrindularitza lasterketen irudiak eskainiko dizkie Tokikomeko komunikabide guztiei, horien artean Goienari.
Txirrindulariak Web orain dela hamabi urte sortutako hedabidea da, eta denbora horretan Euskal Herri osoko maila guztietako txirrindularitza lasterketa gehienen lekuko izan da. Gaur egun "erreferente nagusia" da egutegiko lasterketa guztiak jarraitzeko eta etorkizuneko txapeldunak ezagutzeko.
Euskal Herriko Itzuliari jarraipena
Horrez gain, eta Beterri-Buruntzako Aiurri toki komunikabidearen ahaleginari esker, Euskal Herriko Itzuliaren egunetan Tokikomeko komunikabideek egunero izango dituzte eskura Andoni Urbistondo kirol kazetariak egindako kronikak, Itzulian gertatzen denaren berri Euskal Herriko bazter guztietara zabaltzeko. Goienak ere jasoko ditu haren kronikak.