Atzo heldu ziren Debagoienera El Salvador, Italia, Katalunia, Kolonbia eta Mauritaniatik Mondragon Unibertsitatearen Kooperatibismoa eta Kudeaketa Sozioenpresariala masterreko zazpi ikasle. Nagore Ipiña Humanitate eta Hezkuntza Zientzien Fakultateko dekanoak eta Leire Uriarte aipatutako masterreko koordinatzaileak egin zieten arrera Eskoriatzako campusean.
Nazioarteko hezkuntza programa online eskaintzen den arren, formakuntza osagarri gisa "euskal kooperatibismoa gertutik ezagutzeko" aukera ematen zaie ikasleei; hori da, hain zuzen, egonaldiaren zioa. Apirilaren 1era arte egongo dira Euskal Herrian.
Bisita
Formakuntza saioak egingo dituzte MUren Eskoriatzako campusean, baita hainbat bisita Euskal Herri luze eta zabalean; tartean, Goiena Komunikazio Taldearen egoitzan izan dira gaur. Iban Arantzabal zuzendariaren gidaritzapean, tokiko hedabidearen egitura, helburu eta instalazioak gertutik ezagutzeko aukera izan dute.
