Geroa Bermatuz ekimena berrabiatu du Debagoieneko Mankomunitateak. 2022 honetarako bi saio aurreikusi dituzte. Autonomoen erretiroa eta negozio txikien transmisioa berbagai hartuta, bi astelehenez egingo dira saioak; martxoaren 28an eta apirilaren 4an, hain zuzen.
Lehen saioan autonomoen erretiroaren planifikazioa, adina, etorkizuna, eskubideak eta jarraibideak landuko dira, besteak beste. 9:30etatik 12:30etara, hiru orduko saioa izango da. Bigarren lanketak, aldiz, negozio txikien transmisioa izango du oinarri. Lau orduko saioan (9:30-13:30) negozioaren aukerak, ondorena eta transmisiorako aintzat hartu beharreko aldagaiak izango dituzte hizketagai.
Izen-ematea, beharrezkoa
Presentzialak eta doakoak izango dira bi jardunak, baina plaza mugatuak daudela kontuan hartuta, ezinbestekoa da aurrez izena ematea. Hiru aukera jarri ditu mankomunitateak interesdunen eskura: ondoko galdetegia betetzea, 943 79 30 90 telefonora deitzea, eta rgarcia@debagoiena.eus edo aitziber@debagoiena.eus posta helbideetako batera idaztea.
