Euskaltel-Euskadi 2022ko Espainiako Itzulian izango da, abuztuaren 19tik irailaren 11ra bitartean. Unipublicek, lasterketako antolatzaileak, gonbidatutako hiru taldeetako bat izan da Euskaltel, eta , WorldTourreko 18 talderekin eta 2021eko bi ProTeam onenekin batera izango da lasterketan. Hala, taldeko kirol zuzendari Jorge Azanzak pozarren hartu du albistea: "La Vuelta moduko lasterketek ematen diote zentzua egiten dugun lanari, talde batek urratsak ematen dituela ikusteak. Beste WorldTour lasterketa batzuetan lehiatuko gara, baina La Vuelta itzuli handia da, ibilbidea eta maila beti altuena du. Horrenbestez, gu hor ikustea beste urte batez guztion ametsa da, bai txirrindulariena, bai zuzendaritzarena. Kirol helburuei so, sailkapen orokorra oso mugatuta dagoen arren, etapa batzuk borrokatzeko ilusioa eta itxaropena dugu, batez ere etxean gure zaleen aurrean lehiatuko garen hiru egunetan. Gainera, taldea lasterketa bakoitzean erakusten dituen ezaugarriak azaltzen saiatuko da, halanola, nortasuna, jarrera, eta lehiakortasuna".
Hala, 2022ko Espainiako Itzuliko ibilbideak hiru etapa izango ditu Euskal Herrian, Gasteizen, Guardian, Irunen eta Bilbon, abuztuaren 23, 24 eta 25ean. Talde laranjak, baina, baditu erronka politak gertuago. Esaterako, Volta ao Alentejo (martxoak 16-20) da hurrengo lasterketa, eta hor lehiatuko dira Mikel Aristi eta Julen Irizar bergararrak.