Bihartik aurrera hasiko dira lanuzte eta mobilizazioekin, "garraioaren egoera larria" salatu, sektorean baldintza duinak exijitu eta neurri zehatzak eskatzeko. Astelehenean bezeroei tarifen igoera eskatzen hasiko direla jakinarazi duten, eta datozen egunetan ere elkarretaratzeak egingo dituzte. Martitzenean Nafar Gobernuaren aurrean kontzentratuko dira, eta asteazkenean Gasteizen, Lakuan, Jaurlaritzaren aurrean.
"Inork ez dezala kostuen azpitik lan egin"
Sindikatutik adierazi dutenez, "ezinezkoa" da erregaia zenbateraino garestituko den jakitea, eta "ezinbestekoa" garraioaren tarifak gasolioaren prezioaren igoeraren arabera aldatzea: "Gutxienez hamabost egunean edo hilabetean behin berrikusi behar dira tarifak". Tarifen berrikusketa exijitzeaz gain, azken urteetan egindako aldarrikapenekin ere jarraituko dutela zehaztu dute: "Inork ez dezala kostuen azpitik lan egin, tarifen berrikuspena gastuen gehikuntzaren arabera, eta garraioan diren jokabide makurren kontrolarekin amaitzea, besteak beste postontzi-enpresa, kooperatiba faltsu eta azpikontratazioena".
Hirutik adierazi dutenez, badira bezeroekin tarifak gasolioaren igoeraren arabera berritzea hitzartu dutenak eta gelditzeko asmorik ez dutenak.