Azken bi hilabeteetan 32 edukiontzi erre dituzte Aretxabaletan, hamar Arrasaten eta bost Eskoriatzan. Hori "ulergaitza" egiten zaiela azaldu dute Debagoieneko Mankomunitateko kideek: "Ez diogu inolako zentzurik ikusten, eta kezka handiz bizi dugu. Kezkaz, suteek, edukiontziaz gain, aparkatutako ibilgailuak eta inguruko eraikinak ere kaltetu izan dituztelako, eta pertsonen osasuna ere arriskuan jartzen dutelako. Kezkaz, egileen osasuna ere arriskuan egon daitekeelako, eta, noizbait norbait harrapatzen badute, duda barik ondorio penalak izango dituelako".
Bestalde, gogora ekarri nahi izan dute edukiontziak eskualdeko udaletxe guztien artean erosten direla; hots, herritar guztien diruarekin. "Edukiontzi erreketen kostu ekonomikoa oso handia izan da, 52.500 euro ingurukoa. Eta kalkulu horretatik kanpo geratzen dira suhiltzaileen lanak, edukiontzi berriak jartzeko lanak, garbiketak…", zehaztu du Debagoieneko Mankomunitateak. Bukatzeko, eskatu dute berriro horrelakorik "ez errepikatzeko".
