Ipar Euskal Herriko ikasleek azterketak euskaraz egiteko duten eskubidearen alde, Euskal Herriko Ikastolen Elkarteak, Seaskako ordezkariekin eta Azterketak Euskaraz! kolektiboarekin batera, elkarretaratzeak deitu zituen gaurko. Brebeta –Derrigorrezko Bigarren Hezkuntzaren amaieran egin beharreko azterketa– eta Baxoa –Batxilergo amaieran egin beharreko azterketa, selektibitatearen parekoa– euskaraz egin ahal izatea izan da aldarrikapenen muina.
Ikastolen Etxean egindako prentsaurrekoan adierazi zutenez, ikasleen eskubide urraketak eta desobedientzia zibileko ekintzak egin dituzten irakasleen zigorrak ez dira Seaskako "komunitatearen aurkako erasoa" bakarrik; hots, Frantziako Hezkuntza agintarien erabakiek "euskarari, euskal kulturari, euskaraz bizi nahi duen herri bati egiten zaion erasoa" dela uste dute, "ikastola mugimendu guztiaren aurkako erasoa", alegia.
Erakundeei, alderdi politikoei zein eragile sozialei ere egin zieten aipamena, ikastola guztiak "eraso honi aurre egiteko bat eginda" daudela adieraziz eta beraien erantzukizuna aldarrikatuz.
Bailarako erantzuna
Ikastolen Elkarteak egindako deialdiari erantzunez, hainbat elkarretaratze egin dituzte Debagoieneko ikastoletako ikasle zein irakasleek. Arizmendi Ikastolako ikasle eta irakasleak Arrasaten, Aretxabaletan zein Eskoriatzan bildu dira. Hona zenbait argazki.
Bergara eta Oñati
Arratsaldean heldu zaie bergarar eta oñatiarrei txanda; 17:00etan hasi da elkarretaratzea Aranzadi Ikastolan, eta 16:45erako egin du deialdia Txantxiku Ikastolak, Bigarren Hezkuntzako eraikinaren aurrean.
