Zapatu goizeko 9:30etan ekingo diote Araba, Bizkaia eta Gipuzkoako ia 1.000 ikaslek First Lego League txapelketaren azken erronkari. Hain zuzen, Innobasque Berrikuntzaren Euskal Agentziak antolatutako lehiaketaren 13. edizioaren finala jokatuko da, hiru egoitzatan aldi berean: Bilboko Deustuko Unibertsitatean, Donostiako Tecnumen eta Arrasateko Mondragon Unibertsitatean.
"Haurren eta gazteen artean zientziarekiko eta teknologiarekiko interesa sustatzea" helburu duen nazioarteko hezkuntza-programa bat da First Lego League, eta 970 gaztek hartu dute parte aurten erkidegoko lehiaketan. Ondasun eta merkantzien garraioa berritzea izan da sei hilabetez esku artean erabili duten erronka.
Bi hitzordu finalaren bueltan
Parte-hartzaileak 09:30etatik 14:00etara lehian arituko diren arren, beste bi hitzordu aipagarri utziko ditu zapatuak. Lehena, erakundeetako ordezkarien bisita; 11:00etan, Maria Ubarretxena Arrasateko alkatea, Vicente Atxa Mondragon Unibertsitateko errektorea eta Leire Mugerza Mondragon Corporationeko Biltzarreko presidenteak, besteak beste, lehen pertsonan ezagutuko dituzte gazteen lanak.
Bestetik, eta finala hiru gunetan jokatuta, sare banaketa modu birtualean egitea erabaki dute antolatzaileek. 17:00etatik aurrera ezagutuko dira aurtengo lehiaketako irabazleak, Innobasqueren YouTubeko kanalean egingo duten sari banaketa ekitaldian.