Otsailaren 12an eman zitzaion hasiera Erandion Araba, Bizkaia eta Gipuzkoako duatloi denboraldiari. Astebete gehiago itxaron behar izan dute, baina, duatloi egokituko kirolariek neguko lanen emaitza lehiaketan ikusteko. Zapatuan izan zuten horretarako aukera Sopelan.
Hiru lehiakide aritu ziren nor baino nor gehiago lehen hitzordu honetan; bi bailarako Antxintxika Triatloi Taldekoak. Unai Alberdi bergararrak eta Joseba Azkarate oñatiarrak ezin izan zuten Ion Galarraga Bidania-Goiatzeko kirolaria garaitu. Txirrindularitza sektorean erabaki zuen lasterketa gipuzkoarrak; Alberdi azkarragoa izan zen lehen eta hirugarren sektoreetan, baina Galarragak nagusitasun handia erakutsi zuen bigarrenean.
32 minutu eta 31 segundoan osatu zuen 10,5 kilometroko ibilbidea garaileak –1,5 km aulkian + 7 km bizikletan + 1,5 km aulkian–. Ia bost minutu gehiago behar izan zituen Alberdik, eta beste hainbeste, berriz, Azkaratek.