"Arazo larriak konpontzeko Jaurlaritzak duen borondate eza" salatzeko, Osakidetzan gehiengoa duten Satse, ELA, LAB, CCOO eta UGT sindikatuek bi greba egun eta hiru manifestazio deitu dituzte otsaila bukaerarako.
Otsailaren 25erako egin dute lehen deialdia: Lehen Arretan egingo da lanuztea. Hurrengo egunean emango diote jarraipena aldarrikapenei, Euskal Autonomi Erkidegoko hiru hiriburuetan egingo duten manifestazio banarekin. Azken aldarria, berriz, otsailaren 28an egingo dute. Osakidetza osoan greba eguna deitu dute bost sindikatuek.
Negoziazio mahaia
Urtarrilaren 23an egindako mobilizazioen ostean, Osakidetzak eta Osasun Sailak "pauso bakar bat ere eman ez dutela" adierazi dute Bilbon egin duten prentsaurrekoan. Negoziazio mahaia edukiz "hustu" izana leporatu diote administrazioari, mahai sektorialean edukiak "inposatzen" direla eta "ezer negoziatzen" ez dela iritzita; ondorioz, negoziazio "erreal bat" planteatu arte berriro bertan parte hartuko ez dutela iragarri dute.
