Leire Mugerza izendatu dute Mondragon Korporazioko Kongresuko presidente

Gaur bertan egindako bileran, Mondragon Korporazioko Kongresuko Batzorde Iraunkorrak Leire Mugerza mutrikuarra izendatu du organo horretako zein Kongresuko presidente. Azken zazpi urteetan arduradun izan den Javier Guenetxeari hartuko dio erreleboa, eta Mondragon Korporazioaren irizpide nagusiak edo oinarrizko politikak definitzen dituen organoaren sorreratik kargu gorena izango duen lehen emakumea da.

Mutrikun sortua, Eikan eta Lea Artibai ikastetxean egin du Leire Mugerzak Mondragon Unibertsitatean Ingeniaritza Mekanikoko ikasketak amaitu osteko ibilbide profesionala. Tartean, Eika Taldeko zuzendaritzan, kooperatiba horretako zein Eroskiko Kontseilu Errektoreko presidente karguan, zein 2012az geroztik, Mondragon Korporazioko Batzorde Iraunkorrean aritu da.

Bada, "ohore" gisa hartu du gaur Mondragon Korporazioko Kongresuko Batzorde Iraunkorrak hartutako erabakia; Javier Guenetxeari erreleboa emanez, kooperatiben bilguneko Kongresuko zein Batzorde Iraunkorreko presidente izendatu dute Mugerza. Kargu horretan arituko den lehen emakumea da, gainera. Arlo ezberdinetako esperientziarekin "ekarpena" egiteko asmoarekin hartu du kargua.

Mondragoneko Kongresua

Korporazioko zuzendaritza den Kontseilu Orokorraren eta ordezkaritza instituzionaleko ardura duen Batzorde Iraunkorraren arteko deskargua egiten duen organoa da Kongresua. Taldeko kooperatiba guztiak ordezkatzen dituzten 650 konpromisariok osatzen dute, eta funtsezko gaiei buruzko oinarrizko politikak definitzen ditu; hots, korporazioaren jarraibide edo irizpide nagusiak zehazten ditu.

Mugerzak berak ere izan ditu hizpide bide orriok kargua hartu osteko lehen hitzetan, "nortasun kooperatiboan, ingurunearekiko konpromisoan, jardueren aniztasunean eta lehiakortasunean" oinarritutako proiektua "sendotzen" laguntzeko asmoa duela adieraziz.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.