815.000 euroko aurrekontua izango dute, denera, Udanan eta Arlabanen, euriak eraginda, errepidean sortutako pitzaduren ostean, konponketak egin eta bidea berriz ere erabilgarri jartzeko lanek. 315.000 euro izango dira Udanarako, eta milioi erdi Arlabanerako. Udanako lanak egiteko hiru hilabete eta erdi eta Arlabanekoetarako bost beharko dituztela aurreikusi du Aldundiak. Hala jakinarazi dute martitzeneko Diputatuen Kontseiluaren ostean; urgentziazko izaeraz onartu dituzte lanok, eta horrek dakar, ohiko urratsik barik –lizitazioa...–, kontratu zuzenen bidez enkargatzea. Eta, horrelaxe, ahalik eta bizkorren hasiko dira; urtarrilean, Diputazioko iturriek adierazi dutenez.
Bolibarreko bidea
Eskoriatzan, Bolibar auzorako bide nagusia konpontzeko –ordezko bideetatik dabiltza auzotarrak– 100.000 euro onartu dituzte, eta lanek hiru hilabete irautea aurreikusi.
Kanpanzarren, bikoizketa
Kanpanzarrerako ere onartu ditu Aldundiak beste lan batzuk, 590.000 euroan, lau hilabeteko epearekin. Bestetik, hasi dira dagoeneko, Bizkaiko aldean, beste zati bateko erreietako bat bikoizteko lanak. 900 metro izango dira, lehen bikoiztutakotik gertu, mendateko zuzen nagusian.