Debagoienean maila onenean –Galeano ahizpa antzuolarren baimenarekin– dabiltzan pilotarien arteko lehia izan zen atzo Oñatin. Harmailetan jende dezente batu zen Oñatiren eta Bergararen arteko finala bertatik bertara jarraitzeko, izan ere, herri bietako ordezkariak izan ziren kantxan. Frontoian, baina, Etxegarai eta Oses hobeto ibili ziren, hasieratik, gainera. Abantaila hartu zuten markagailuan, eta une baten bergararrek aldea txikitu bazuten ere, Barrocal eta Bergara ez ziren ohiko mailan ibili. Partidu amaieran aitortu zuten ez zirela batere gustora geratu egindakoaz, Barrocal bera eskuetatik oso justu iritsi zen finalera, eta egindako torneoaz bai, gustora, baina azken partiduan erakutsitako mailarekin ez ziren pozik.
Irabazleek, berriz, partidu borobila egin zuten. Etxegaraik eta Osesek bazekiten eustea zela gakoa, kontrarioaren akatsa bilatzea, eta pazientziarekin, eurek seguru jokatzea. Halaxe egin zuten, jokoa atzeko koadroetara eraman zuten, eta aurrean Barrocal ez zen bestetan moduko erabakigarria izan (22-9). Hala, aurreikusi baino erraztasun handiagoarekin jantzi zuten oñatiarrek txapela.
