Euskarazko eredu bakar, orokortu eta inklusiboa, hezkuntzako eragileen eta euskalgintzaren eskaera

Hezkuntza eragileetako, euskalgintzako eta eragile sindikaletako ordezkariak, talde argazkian. (Argazkia: Euskalgintzaren Kontseilua)

Euskaraz hezi, berdintasunean hazi adierazpena aurkeztu zen atzo Gasteizen. Hezkuntza Lege berrian "eredu sistema baztertzailea gainditu" eta ikasle guztiei euskara "gaitasun egokia" bermatuko dien eredu orokortu, bakar eta inklusiboa ezartzeko eskaera egin zuten hezkuntzako eragileek eta hezkuntzako esparruan diharduten hainbat sindikatuk, Euskalgintzaren Kontseiluarekin batera.

Eusko Legebiltzarrean Hezkuntza Lege berria adosten ari diren garaiotan, hezkuntzako, euskalgintzako eta hezkuntzako esparruan diharduten sindikatuetako hainbat eragilek Euskaraz hezi, berdintasunean hazi adierazpena aurkeztu zuten atzo. Zehazki, Ikastolen Elkartea, EHIGE, Kristau Eskola, Hik Hasi eta EHIZE batu dira adierazpenera hezkuntza eragileetatik; euskalgintzako ordezkari gisa, Euskalgintzaren Kontseiluak hartu du konpromisoa; eta hezkuntzako esparruan diharduten ELA, LAB eta Steilas sindikatuek ere bat egin dute adierazpenarekin.

Hona, hitzez hitz, eskaria: "Hemen bildu garen eragileok eskatzen dugu hezkuntza-hitzarmenean berariaz jaso dadila hurrengo legeak ereduen sistema baztertzailea gainditu eta ikasle guztiei euskara gaitasun egokia bermatuko dien eredu orokortua ezarriko dela".

Gaitasuna eta berdintasuna

Eragileek azken hamarkadetan hezkuntza-sistemak egin duen ekarpenari "aitortza" egin nahi izan diote, baina adierazi dute ezagutzaren unibertsalizazioa "oraindik urrun" dagoela, eta gaur-gaurkoz "ikasle askori" ez zaiola "euskarazko gaitasun egokia eskuratzeko eskubidea bermatzen".

Horrez gain, gizarte kohesioan eta aukera berdintasunean ere jarri nahi izan dute enfasia. Adierazpenean jasotzen denez, "gizarte bizitzan zein garapen profesionalean aurrera egiteko oinarrizkoa da euskaraz eroso aritzeko gaitasuna eskuratzea". Bide horretan, jatorriak, egoera sozioekonomikoak, egoera soziolinguistikoak edota beste edozein irizpidek sortu dezakeen bereizkeria baztertu, eta berdintasuna bermatzeko oinarrizko urratsa "gutxien duenari gehiago ematea" dela adierazi dute. Beraz, eragileen iritziz "oinarrizko euskara-gaitasuna belaunaldi berri guztiei bermatuko dien eredu berri orokortua ezartzea da aukerarik justuena eta berdinzaleena".

Konpromisoa

Eskatzetik harago, eragiteko konpromisoa ere hartu zuten adierazpena izenpetu zuten eragileek. Hezkuntza legearen inguruan parte hartzen duten foroetan edota egiten dituzten harremanetan "eskaera defendatzeko" konpromisoa hartu dute guztiek, "ereduen sistema segregatzailetik euskarazko eredu orokortu inklusibora jauzia egiteko unea" dela gomutan hartuta.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.