Ezker Anitza-IUk X. Asanblada egin zuen atzo Bilbon Indarrak batuz: Horizonte vida digna lelopena, eta bertan Isabel Salud aukeratu zuten berriz ere alderdiko koordinatzaile orokor izateko. Batzarrean batutakoen %87aren babesa jaso zuen Saludek, eta hirugarren aldiz hartuko du kargua.
"Hainbeste urte eta gero ehuneko hain handiarekin aukeratu izana atsegina da", adierazi du Saludek, eta gaineratu: "Jendearen babes handia da hori, jarraitzeko eskatu badidate gustura daudelako da, eta ni ere gustura nago". 2012az geroztik da alderdiko koordinatzaile orokorra.
Erronken inguruan galdetuta, bi azpimarratzen ditu. Batetik, oinarriko edo tokiko antolaketa indartzea: "Edozein aldaketa politiko lortu nahi badugu ezinbestekoa da herrietan eta hirietan lan egitea, jendearengandik gertuen daudenak direlako", dio Isabel Saludek. Bestetik, Elkarrekin Podemosekin duten aliantza erakundeetatik haratago ere eroan gura dute: "Helburu bakarrarekin, EAJ boteretik kentzea. Uste dugu erakundeen berritzea beharrezkoa dela osasun demokratikorako".
