Debagoieneko ESIko Anestesia Zerbitzuko hainbat langilek azaroaren 29tik aurrera greba mugagabe baterako deialdia egitea erabaki dute. ESK sindikatuak bidalitako prentsa oharraren arabera, "lan-baldintzen etengabeko zapaltze jasanezina" eta "horiei konponbidea emateko gai ez den zuzendaritza baten entzun nahi eza" dira lanuztea deitzeko arrazoi nagusiak.
Bost eskaera
Anestesia Zerbitzuko langileen lan-baldintzak "duintzeaz" gain, "sareko edozein ospitaletan lan egiten duten gainerako lankideenak ere duintzea" da aldarrikapenaren helburua. Horretarako, bost baldintza edo eskaera izango dira lanuztearen oinarri:
- Pertsonala egokitzea, kontratu duinak dituzten espezialista gehiago kontratuz.
- Hitzarmen arautzaileak jasotzen dituen zaintzak egitea, banaketa modu bidezkoan eta kontziliazioa aintzat hartuta eginez.
- Lanaldi murriztua duten langileen zaintzen murrizketa proportzionala.
- Aurreikusi ezin diren kontingentziengatik zaintza gehiago egin behar badituzte, benetako lan ordu gisa zenbatzea.
- Akordio arautzaileari jaramon egin eta lan zein zaintza egutegiak bi hilabete lehenago jakinaraztea.
