Arrasatearrek, aretxabaletarrek eta eskoriatzarrek osatutako taldetxoak Arrasateko Errementari plazan zuen eginda hitzordua atzo goizean. Ateri eta halako ibilaldi baterako giro ezin hobea izanik, gogotsu ekin zioten ibilbideari. Bidegorritik aurrera, Aretxabaleta eta Eskoriatza zeharkatu zituzten, eta Kuatruenetik aldapan gora, Gatzagako bidea hartu zuten.
Gorosarri landetxera iritsitakoan geldialditxoa egin zuten urtero legez. Edatekoa, fruta eta intxaurrak eskaini zizkieten han. Behin indarrak berreskuratuta, aurrera jo zuten eta 13:00etarako Leintz Gatzagara iritsi ziren.
Bigarrenez egindakoei, txapela
Ohiturari eutsiz, bigarren aldiz parte hartutakoei txapela oparitu zien Gatzagako Udalak. Oraingoan, Nestor Aranak eta Peli Beltran de Herediak jaso zuten hori Beñat Agirreurreta Kirol zinegotziaren eskuetatik. Eguna borobiltzeko, Juanito Bengoa zinegotziak prestatutako babarrunak eta ardia bazkaldu zuten Toki Eder elkartean.
