Negua dator eta errefuxiatu-guneetan hotza inoiz baino nabariagoa da. Hori dela-eta egin du Zaporeak elkarteak oinetako bilketa Euskal Herriko hainbat herritan. Gurera etorrita, Oñatin, Arrasaten, Aretxabaletan, Aramaion eta Eskoriatzan egin dute. Bergara ere batu da ekimenera, hango Ndank Ndank elkarteak ere egin baitu ekarpena.
Tamaina guztietako oinetakoak batu dituzte, eta gaur batutakoei gehitu behar zaizkie aurrez ikastetxeetan jaso dituztenak. Jasotako horiek Atenasera, Lesbosera eta Siriako errefuxiatuen kanpalekuetara bidaliko dituzte. Azken helmuga horretara bidaltzeko lanak Siriako Lagunen Elkarteak hartuko ditu bere gain.
