IX. denboraldiz, bueltan da Bizilagunak egitasmoa. Hainbat elkarte eta erakundek babestutako proiektu honek herritarren arteko estereotipoak eta aurreiritziak apurtzea zein arrazakeriaren aurka borrokatzea du helburu, beti ere bertakoen eta migratzaileen arteko harremanak sortuz eta ehunduz. Debagoieneko kasuan, Arrasateko Udalaren aniztasun saila, Ekin Emakumeak, AMS, IMME, Fundacion Goyeneche, Harrera Etxea Arrasate eta Gipuzkoako SOS Arrazakeria ari dira antolakuntza lanetan.
Azaroaren 14an, domeka, izango dute bizilagunek zita. Aurten arte etxean antolatzen ziren bazkariak, baina ingurune itxietan biltzea saihestea helburu, hiri eta herrietako parke, merendero eta berdeguneetara zabaldu nahi izan dute antolatzaileek ekimena. Proposamen hau da, hain zuzen, aurtengo berritasun nagusia.
Hiru aukera
Bertako zein migratzaile, hiru aukera dituzte herritarrek bazkarietan parte hartzeko: anfitrioi den familia bezala, gonbidatu den familia gisa edota familiak elkar ezagutzen laguntzeko ardura izango duten dinamizatzaile modura. Urtero bezala, familia bakoitza bere jaioterriko plater edota janari tipikoa prestatzeaz arduratu beharko da.
Izen-ematea
Parte-hartzeko eta enkontruak antolatzeko ezinbestekoa da izena ematea, eta antolatzaileek hiru bide jarri dituzte horretarako. Galdetegi bidez eman dezakete izena bai familiek eta baita dinamizatzaileek ere, eta horrez gain, 943 32 18 11 telefonora deituta zein bizilagunak@sosracismo.eu helbidera idatzita hartu liteke parte bazkarietan.
