Epaitegiek horrela ebatzita, metalen hitzarmen kolektiboa aplikatuko zaie Landazabalgo langileei

2020an Gureak Lanean S.A. enpresarentzat lan egitetik GKNren azpikontrata gisa lan egitera igaro zirenean, lan hitzarmen kolektiboa aldatu zitzaien Bergarako Landazabal enpresako 64 beharginei; zehazki, Siderometalurgiaren Hitzarmena aplikatzetik Errepideko Salgaien Garraioaren Hitzarmena aplikatzera. Epaitegietara jo zuten langileek, eta Eibarko Lan Arloko Epaitegiak ebatzi du Gipuzkoako Metaleko Hitzarmena dela dagokiena.

ELA sindikatuak prentsa ohar batean adierazi duenez, 2020aren erdialdean langileen baldintzak "kaltetu" zituen hitzarmen aldaketak; hots, Gureak Lanean S.A. enpresan Siderometalurgiaren Hitzarmena aplikatzen zitzaien Landazabaleko 64 langileei, baina pertsonala subrogatzean, Errepideko Salgaien Garraioaren Hitzarmena aplikatzeri ekin zioten. Langileek "euren eskubideak defendatzeko" epaitegietara jotzea erabaki zuten.

Bada, gaur eman du auziaren ebazpena Eibarko Lan Arloko Epaitegiak, eta langileei dagokien hitzarmena metalena dela ebatzi du. ELAren hitzetan, sententziak langileek "hasieratik arrazoia zutela" frogatzen du, eta hitzarmen kolektibo zuzena aplikatzea enpresek "legez egin behar duten zerbait" dela adierazi du. Epaitegira jo behar izan gabe, sindikatuaren arabera "enpresak hitzarmen kolektiboa eta horren atzerapenak askoz lehenago aplika zitzakeen".

Eskaera enpresari

Langileak zoriontzeaz gain, eskaera zuzen bat egin dio ELAk Landazabali: "Epaia ahalik eta lasterren aplikatzeko".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.