“Orain dela hamar urte, 50 urte bete nituenean, ikuskizun bat sortu eta hainbat tokitan eskaini nuen. Oso gustura jardun nuen eta harrera polita izan zuen. Azaroaren 18an 60 beteko ditut, eta horren aitzakian beste ikuskizun bat prestatzea pentsatu nuen”, azaldu du Goio Arrietak eta zera gaineratu du: “Grabatutako musikarekin egin nuen aurrekoa, baina oraingoan nire bi loba musikari eta artistei proposatu nien elkarrekin egitea ikuskizuna. Baiezkoa eman zidaten eta hala hasi ginen orain dela sei hilabete inguru entseguak egiten. Asko ari naiz eurekin gozatzen, musikari ikaragarriak dira biak ala biak eta oso babestuta sentitzen naiz taularen gainean eurekin”.
1961aren bueltan
Urte horretan jaio zen Arrieta, eta orduko kantuak eta efemerideak aintzat hartuta osatu du Hiru (h)arri ikuskizunaren muina. “Hainbat musikari gonbidatzen ditugu, atzo, Zaldibarren, esaterako, Manu Chao, Andres Calamaro eta Alex Sardui izan ziren. Lehenengo biak urte berean jaiotakoak dira eta nire egun berean, azaroaren 18an, berriz, Sardui.
Azaroaren 6an eta 7an, Arkupen
Gustura jardun zuten musikariek taularen gainean eta hala zeuden aretoan batutako ikusleak ere. “Atzoko estreinaldia ondo joan zen, nahiz eta bart hainbat alditan itzartu naizen gaizki egindakoekin ametsetan, baina, orokorrean, gustura nago, eta akatsetatik ikasita, pozarren eskainiko dugu datorren hilean Aretxabaletan. Bi emanaldi egingo ditugu Arkupe kultura etxean, azaroaren 6an eta 7an”.
