Urtero, Gipuzkoako Okindegien Elkarteak hainbat ekimen antolatzen ditu produktu horri balioa emateko eta sektore horretako profesionalen lana ikusarazi eta zabaltzeko. "Aurtengoan ere, produktu atsegingarri honen zaleek izango dute zer gozatu, dastatzea, zozketa eta bestelakoak antolatu dituzte okindegietan". Hala, ZOGIonak lelopean egingo duten kanpainaren baitan, salmenta puntuetan opiltxo edota gozokiak entregatuko dizkiete bezeroei 38 okindegik.
Horrez gain, martxan jarri dituzten ekimenekin jarraituko dute. Eguneko ogia egitasmoaren baitan, egun bakoitzeko ogi bat aurkeztuko du okindegi bakoitzak eta bezeroek probatzeko aukera izango dute. Gainera, erosketak egiten dituzten bezero guztiek zozketa batean parte-hartuko dute. Urriaren 17an egingo dute zozketa, eta okindegi bakoitzeko bost irabazle egongo dira. Irabazleek hurrengo astean zehar (urriak 18-24) "oparitxo bat" jasoko dute okindegiaren partez.
Azkenik, okindegiek zorion txartelak biltzeko kutxa batzuk jarri dituzte denda bakoitzean, bezeroek euren zorion mezuarekin betetzeko (idatziz, marrazki bat eginez, bertso batekin, eta abar). Zorion txartel guztien artean originalenak aukeratuko dira, guztira hiru, eta irabazleek landetxe batean asteburu bat irabaziko dute.
