Asteburu honetako emisioaren ostean, hurrengo astetik aurrera, berriz, Teknopolis bere ohiko ordutegira itzuliko da: zapatutan 13:30ean ETB1en eta domeketan ETB2n, ordu berean.
Iñaki Leturia Yurrita izango da aurten ere aurkezlea, eta zuzendariak, berriz, Nagore Rementeria Argote eta Leturia bera izango dira.
Eskarmentu handiko saioa
Leturiak prentsaurrekoan azaldu duenez, azken hilabeteak koronabirusaren pandemiak baldintzatu ditu; erronka handia izan da Teknopolisentzat osasun-krisiaren nondik norakoak publiko orokorrari azaltzea, eta ederki asko gainditu du. Orain ez dute koronabirusaren gaia baztertuko, noski, baina beste asko dituzte esku artean, "zientzia, ikerketa eta berrikuntza gelditu ez diren seinale, ez eta gai horiek komunikatzeko beharra ere".
Teknopolisen ezaugarrien artean, zorroztasuna eta zehaztasuna nabarmendu ditu Leturiak, eta, horiekin batera, gertutasuna: izan ere, 24 denboraldik eskarmentu handia eman die zientzia-gaiak modu interesgarri eta entretenigarrian azaltzeko.
Prentsaurrekoan, lantzen ari diren gaietako batzuen berri eman dute, hala nola itsaslabarren azterketa droneen bidez, elikadura osasungarriaren eta jasangarriaren arteko oreka zaila, armiarma-sareak, argindarraren prezioaren gorabeherak edo mikrotxipen krisia.