Urriaren 13an abiatuko da Debagoieneko Mankomunitateko Garapen Agentziak sustatu eta Europako Gizarte Funtsak %50ean finantzatzen duen Hazilan proiektua. 11. edizioa da aurtengoa eta egubakoitzera arte dago izena emateko aukera.
Momentura arte, 150 pertsona baino gehiagok hartu dute parte egitasmoan. Hauek dira parte hartzeko bete behar diren lau baldintzak: 20-44 urte bitartean izatea; goi-mailako ikasketak amaituta izatea (lanbide heziketako goi-mailako ziklo bat edota unibertsitate ikasketak); langabezian egotea (ez da ezinbestekoa); eta Debagoieneko herriren batean erroldatuta egotea.
Sustatzaileen esanetan, Hazilanek gazteen gaitasunak "identifikatu" eta "indartzen" ditu eta lana lortzeko behar diren baliabideak eman, 80 orduko tailer teoriko-praktiko batean. Horren ostean, eskualdeko enpresetan praktikak egiten dira, lan-esperientzia hartuz eta enplegurako sarbidea erraztuz.