Euskaltzaleen Topagunearen proiektua hizkuntza aniztasuna aitortzeko eta herritarren arteko harremanak sustatzeko pentsatuta dago. Baina horrez gain, Auzokon, bizikidetzarako espazioak sortu nahi dira, euskara ardatz hartuta. "Euskararekin harremanik izan ez dutenek euskararako bidea egitea da asmoa; garrantzitsua da euskal hiztunak diren herritarren parte hartzea zein inplikazioa. Horregatik, euskaraz bizi diren herritarrak funtsezkoak dira egitasmoan" diote.
Astero, ordu eta erdi inguruko saio irekiak egiten dira, eta euskarara gerturatzeko dinamikak egiten dituzte. Horrez gain, ekintza osagarriak ere egiten dituzte taldeek; hala nola, eragileak edota ohiturak ezagutzea.
Eragileak elkartzeko erronka
Sustatzaileen esanetan, ikasturtez ikasturte, proiektua "zabaltzen, egonkortzen eta hobetzen" saiatzen dira, eta horretarako erronkak zehazten dituzte. "Herritarren bilgune izateko bidean, uste dugu herriko eragileen inplikazioa eta saretzea ezinbesteko dela; hala, Auzoko dagoen herrietan bertako eragileen artean aliantzak sortzea da aurtengo erronka", zehaztu dute. Modu horretan, eragileen elkarrengandik ikasteko aukera indartu nahi da aurten.