Kadete mailako Eibarko Saria jokatu dute asteburuan Eibarren. Berez uztailean ziren kadete mailan denboraldia amaitzekoak, baina antolatzaile eibartarrak tematu egin ziren proba irailean egiten, eta horrek aukera eman die gazteei denboraldia abuztua eta gero ere luzatzeko. Bada, 60 txirrindulari batu ziren irteera puntuan, eta udan sasoian ibili diren horien arteko borroka izan zen. 68 kilometro izan zituen lasterketak, Eibarren hasi eta Eskoriatzarako bidea hartu zuten ziklistek, eta bistan zegoen Soraluzeko saihesbideko maldek min egingo zutela. Halaxe izan zen. Lehenengo joaldian bost laguneko taldeak egin zuen aurrera, tartean zegoen Unax Errasti, eta euren artean ondo moldatu ziren erreleboak emateko. "Bi minutuko tartea lortu zuten tropelarekiko, eta bueltan, ostera ere Soraluzen, Errastik ostera ere estutu egin zuen eta taldetxoa apurtu eta bi ziklista geratu ziren aurrean, baina tarte txikiarekin", adierazi du Lokatzako ordezkari Iñigo Larañagak. "Gero, Maltzagako maldatxoan azken erritmo aldaketa egin eta hor egin zuen aurrera, bakarrik helmugaratzeko".
Sailkapena, hemen.
