Eustatek datu ofizialik eman ez duen arren, dagoeneko adituek ohartarazi dute pandemiaren eraginez suizidio-tasak gora egin duela 2021ean. EAEko datuen faltan, Kataluniara joz gero, bertan ikertu denaren arabera, itxialdiaren ostean, %27 egin zuten gora suizidioek.
Mundu mailako datuak aztertuz gero, urtean 700.000 suizidio baino gehiago izaten dira; hots, heriotza bat berrogei segunduro.
Gurera bueltatuta, Jaurlaritzako adierazpen instituzionalean jakinarazi dutenez, azken hamar urteetan, EAEn, 1.500 pertsona baino gehiago hil dira suizidatuta; urtean 169 lagun, batez beste. "Suizidioen kopurua trafiko-istripuetako heriotzen ia bikoitza da, eta heriotza-kausa nagusia da", diote oharrean. Horrez gain, azaldu dute Osakidetzako osasun mentaleko sareak 640.000 kontsulta baino gehiago artatu dituela pandemian sasoian.
Adin-tarteei erreparatuta, argi geratzen da suizidioa ez dela populazioaren zati jakin bati eragiten dion kontua; 19 urtetik beherako bi lagunek eta 90etik gorako seik ere haien buruaz beste egin zuten iaz, erkidegoan.
Adituak eta agintariak bat datoz: suizidioa prebenitzea eta horri aurre egitea gizarte osoaren ardura da.