Denboraldiaurrean normaltasunarekin jardun eta gero –iaz, COVID-19 kasuak tarteko Aloña Mendiko eta Mondrako jokalariek konfinatuta egon behar izan zuten–, asteburuan hasiko dute liga. Hain zuzen, iaz, denboraldia hasi gabe zegoenean, Oñatikoak jada jabetu ziren urte gogorra izan behar zutela aurretik, eta gurago izan zuten ez lehiatu. Ez zen erabaki erraza, eta urtebetez futbolean jokatu barik egon dira: "Gogo handiz gaude. Egia da urtebete egin dugula berdeguneetatik urrun, baina nik uste dut mentalki besteak baino freskoago gaudela, pandemia urte honetan futbolak ez gaitu baldintzatu, eta gainontzeko taldeendako denboraldi zaila izan da. Eta freskotasun hori baliatu behar dugu", adierazi dio GOIENAri Gaizka Irizar kapitainak.
Aloña Mendi-UDA etzi
Urteak dira Aloña Mendik eta UDAk elkarren kontra jokatu ez dutela; bost, zorrotzak izateko. Eta domekan bien arteko derbiarekin hasiko dute liga (16:30, Azkoagain). Bergarak, berriz, Allerru hartuko du Agorrosinen (zapatua, 16:30), eta Mondrak, azkenik, joan den asteburuan Arrasate Hiria torneoa irabazi berri duen Elgoibarren zelaian jokatuko du (zapatua, 16:30).
Leintz Arizmendikoei zigorra
Emakumezkoen Ohorezko Erregional Maila irailaren 18ko eta 19ko asteburuan hasiko dute. Eta maila horretan izango dira Leintz Arizmendi eta Bergara. Hain zuzen, duela bi urte kategoriaz igo eta gero, pandemiagatik ligan partidurik ez jokatzeko erabakia hartu zuten Leintzeko neskek –Euskal Ligak aurrera egin zuen– eta Euskadiko Federazioaren partetik zigor proposamen baten berri izan zuten debagoiendarrek. Hala, zigorra gauzatu egin dute.